Борнмут со победата од 3-0 против Кристал палас ја презеде водечката позиција во трката за шестото место во Премиер лига, позиција која оваа сезона би можела да донесе и невообичаен пласман во Лигата на шампиони.

Англија доби дополнително место во Лигата на шампионите благодарение на европскиот коефициент, што значи дека и петтопласираната екипа ќе игра во најсилното клупско натпреварување. Ситуацијата дополнително се комплицира доколку Астон вила ја освои Лига Европа, што би обезбедило уште едно место во ЛШ и за шестиот на табелата (ако Астон вила преку првенството исто така обезбеди ЛШ).

Во тој случај, можно е да се случи речиси апсурден расплет, шестопласирана екипа да мора да загуби во последното коло за да обезбеди настап во Лигата на шампионите. Според „Би-би-си“, ваквото сценарио иако малку веројатно, не е невозможно. Во последното коло, Брајтон го пречекува Манчестер јунајтед, додека Брентфорд гостува кај Ливерпул.

Во моменталната ситуација, Ливерпул е пред Астон вила само поради подобра гол-разлика, додека Манчестер јунајтед има шест бода предност. Ако Брајтон или Брентфорд бидат сигурни дека ќе го задржат шестото место дури и со пораз, тогаш тој пораз би можел да им донесе пласман во Лигата на шампиони наместо во Лига Европа.