Политичката партија Левица ги објави носителите на кандидатските листи во шестте изборни единици, под слоганот неподмитливите.

Еднаш засекогаш ќе ги предизвикаме политичките елити кои управуваат со нашите животи и ќе ја вратиме политиката моќ во рацете на работничката класа. Нашите носители и идни пратеници во Собранието на Република Македонија ќе бидат гласот на народот во Собранието, како што докажаа и нашите досегашни пратеници. Од нас сите зависи силата со која ќе го вратиме ударот и судбината која сами ќе ја создадеме. Никогаш повеќе да не владеат над нас криминалот, корупцијата и профитот, порачаа од партијата.

Носител во изборната единица 1 е претседателот на Левица, Димитар Апасиев кој е пратеник во Собранието, доктор на правни науки и професор на Правниот факултет при Државниот универзитет „Гоце Делчев“ – Штип.

Носител во изборната единица 2 е Амар Мециновиќ, портпарол на Левица, член на Президиумот на Партијата и член на Советот на Град Скопје, активист за социјална правда и сочувување на животната средина.

Носител во изборната единица 3 е Борислав Крмов, пратеник во Собранието на Република Македонија, член на Президумот на Левица и долгогодишен борец за социјална правда.

Носител во изборната единица 4 е Сашко Јанчев, магистер по кривично право, член на централниот комитет и советник на Левица во Општина Гевгелија. Тој е повеќегодишен борец за заштита на животната средина со фокус на југот на државата и борбата за Кожув да е национален парк.

Јована Мојсоска, дипломиран криминолог по финансиски криминал и генерален секретар на Левица е носителка во изборната единица 5. Таа е долгогодишен борец за социјална правда и заштита на животната средина и животните.

Носител во изборната единица 6 е Игор Димески, раководител на Сектор за енергетика и советник на Левица во Општина Центар.