Атмосферата на „Алијанц Ривиера“ беше пеколна, а клучниот момент се случи во 33. минута. Од трибините почнаа да летаат петарди кон гостинските играчи. Една петарда го погоди левиот бек на Марсеј, Емерсон, по што на теренот настана голема гужва во која влегоа резервните играчи на двете екипи. Чудо е како никој не доби црвен картон, но мечот од тој момент стана уште поинтензивен, а Марсеј на крај возврати со „петарда“ во мрежата на Ница – 5:1.

Иако по половина час игра водеа со 2:0 преку Пјер Емерик Обамејанг и Мејсон Гринвуд и имаа контрола, Марсеј успеа да влезе во непотребен хаос. Гостите не сакаа да се повлечат, а Ница не сакаше да се предаде. Шансите почнаа да се редат буквално секоја минута. Ница имаше два зицера преку Терем Мофи, се обиде и Џума Ба, но топката едноставно не влегуваше. На чудо, Марсеј сепак замина со предност од два гола на полувреме.

Кога ситуацијата на трибините и на теренот се смири за време на паузата, гостите почувствуваа „крв“ и решија да зададат завршен удар. За само пет минути тимот на Де Зерби го замолкна стадионот. Прво Гринвуд постигна втор гол, а потоа Тимоти Веа од одбиток ја „положи“ Ница. Тренерот на домаќините, Франк Хајс, можеше само да фрли бел пешкир, свесен дека секоја понатамошна офанзива би значела уште поголем дебакл.

Екипата на Де Зерби покажа дека, колку и да делува хаотично на моменти, има напаѓачки потенцијал со кој може да даде гол или два против секого. На крајот на краиштата, кога Обамејанг со 36 години ќе запише гол и асистенција без никакви проблеми, јасно е за каква класа станува збор. Останува само прашањето колку долго ќе успеат да го држат чекорот со Пари Сен Жермен.