Поранешниот прв пик на НБА драфтот и еден од најдобрите плејмејкери во поновата историја, Џон Вол, одлучи да стави крај на својата професионална кошаркарска кариера. Веста ја потврди самиот 34-годишен Американец преку објава на социјалните мрежи, каде кратко и јасно порача: „Пензиониран, но не сум готов“.

Вол во НБА пристигна во 2010 година како прв избор на драфтот по блескавата една сезона на Универзитетот Кентаки, под водство на реномираниот тренер Џон Калипари и заедно со ѕвезди во подем како Демаркус Казинс, Ерик Бледс и Патрик Патерсон.

Најголемиот дел од кариерата ја мина во дресот на Вашингтон визардс (2010–2020), каде изгради репутација на еден од најдобрите организатори на играта во лигата. Подоцна настапуваше за Хјустон и ЛА Клиперс, но од 2023 година е без клуб.

Кариерата ја завршуваа со просек од 18,7 поени, 8,9 асистенции, 4,2 скока и 1,7 украдени топки на 647 НБА натпревари. Вол беше класичен плејмејкер, од „старата школа“, секогаш со визија да го пронајде соиграчот, но и со способност сам да преземе одговорност кога е најпотребно.

Во 2019 година потпиша супермаксимален договор со Вашингтон, но серија тешки повреди го оддалечија од терените и влијаеја на неговата психа, самиот призна дека се борел со депресијата и бил на чекор да се откаже уште тогаш.