Светскиот ден на театарот 27 март во Битолскиот театар ќе биде одбележен со изведба на легендарната комедија „Сомнително лице“ од Бранислав Нушиќ во режија на Деан Дамјановски.

– Светот на „Сомнително лице“ на Нушиќ, прочитан денес, претставува еден дистопичен свет во кој шпионирањето и недовербата, како и лицемерието, корупцијата и стравот, се нешто сосема нормално. Тоа е свет во кој гротеската станува реализам, а фарсата повторно станува историја. Самиот Нушиќ, во оригиналниот ракопис за „Сомнително лице“, во поднаслов има напишано „гоголијада во два чина“. Нашата претстава може да ја наречеме „современа нушиќијада“, или, искривено огледало во кое светот и луѓето во него се претставени токму онакви какви што се – истакнува режисерот Дамјановски.

Главната улога во претставата ја толкува актерот Марјан Ѓорѓиевски, а заедно со него на сцената на Битолскиот театар ќе настапат и Валентина Грамосли, Јулијана Мирчевска, Никола Пројчевски, Филип Мирчевски, Петар Спировски, Борче Ѓаковски, Никола Стефанов, Александар Копања, Александар Стефановски, Васко Мавровски и Сандра Грибовска.

Сценографијата и дизајнот на плакатот се на Филип Јовановски, костимите се на Андреј Папаз Ѓоргиевски, а композитор на музиката е Марјан Неќак.

(Текстот е објавен во „Културен печат“ број 325, во печатеното издание на весникот „Слободен печат“ на 20-22.3.2026)