Поранешниот романски репрезентативец Георге Попеску кој е во фудбалска пензија речиси 20 години, откри дека неговите две деца не добиваат преголем џепарлак.

Попеску кој во 1990-тите години беше и капитен на Барселона, е оженет со сестрата на легендарниот романски фудбалер Георге Хаџу, Луминица и имаат две деца, 21-годишната Марија и 19-годишниот Николас.

Марија неодамна ги заврши студиите во Барселона, а нејзиниот татко кој моментно е претседател на Фарул, на романските медиуми им откри дека секој месец на својата ќерка и дава по 1.000 евра.

– Ќерка ми дипломираше на еден од најдобрите економски универзитети на светот. Студираше во Барселона, а јас и го плаќав школувањето, сместувањето и секој месец и давав по 1.000 евра. Во Барселона е тешко да се живее со 1.000 евра, тоа значи дека дневно на располагање имаше по 30 евра. Ако сака повеќе пари нека работи. Парите не смеат да се расфрлаат, тешко е да се заработат и толку колку што добива – рече Попеску.

Синот Николас игра за јуниорскиот тим на Фарул каде татко му е претседател, и има стипендиски договор од 500 евра.

– Нико има плата од 500 евра која ја добива клубот. Толку добиваат играчите кои ќе наполнат 16 години и ќе потпишат договор, и Нико не е исклучок. Тој се храни во клубот, а јас му го плаќам сместувањето. Останатите трошоци си ги подмирува од неговата плата. Ако сака повеќе пари, нека заигра за подобар и поголем клуб и ќе заработува повеќе – порача Георге Попеску.