Лазаров: Длабоко во себе верувам во невозможни мисии и работа и само така можеме да одиме напред
Ракометната репрезентација на Македонија денеска ги доби противниците во групната фаза на Светското првенство кое во јануари идната година ќе се одржи во Полска и Шведска.
Македонија се најде во групата Ф заедно со селекциите на Норвешка, Аргентина и Холандија, а селекторот Кирил Лазаров смета дека иако групата е тешка, фокусот треба да биде на подготовките пред настапот на ракометниот мундијал.
– Многу интересна и тешка група за нас. Не можам да бидам објективен, затоа што нашата репрезентација за прв пат ќе настапи без ракометари од калибарот на Миркуловски, Стоилов, Лазаров.. Ме загрижува и неиграњето на Вардар во Лигата на шампионите, затоа што некои од нашите репрезентативци остануваат без потребните силни натпревари во текот на сезоната и пред почетокот на СП. Не ни останува ништо, освен да почнеме да го оформуваме ликот на новата репрезентција на Македонија. Длабоко во себе верувам во невозможни мисии и работа и само така можеме да одиме напред. За Норвешка не треба да трошиме зборови, Холандија беше хит на последното Европско првенство. Аргентина со години знаела да прави големи проблеми и на посилни репрезентации од нашата. Ќе се фокусираме на себе и нашата селекција и ќе работиме на тоа што подобро да се подготвиме за настапот на СП – вели Лазаров.