Ландсбергис прашува: Зошто да одам во Скопје и да преговарам со човек кој не треба да лета во демократски земји?
Литванскиот министер за надворешни работи, Габриелиус Ландсбергис на својот профил на Икс објави дека нема да присуствува на Самитот на ОБСЕ во Скопје бидејќи на него ќе учествува шефот на руската дипломатија Сергеј Лавров.
„Зошто би летал до Скопје на Самитот на ОБСЕ за да дискутирам за европската безбедност со човек на кој не треба да му се дозволи да лета во демократски земји освен ако неговата дестинација не е Хаг?“ напиша тој на Икс.
Why would I fly to the @OSCE in Skopje to "discuss European security" with a man who shouldn't be allowed to fly to democratic countries unless his destination is The Hague?
— Gabrielius Landsbergis🇱🇹 (@GLandsbergis) November 28, 2023
Во неговите претходни коментари на социјалните мрежи, Ландсбергис ја коментираше поддршката на неговата земја за Украина.
„Во моментов ги имаме сите ресурси што им се потребни на Украинците, освен волјата да ги оставиме да победат. Треба да дозволиме украинската храброст да не инспирира наместо да дозволиме стравот од Русија да не ограничува. Треба да се плашиме од руска победа, а не од правдата за Украина“ напиша тој.
Балтичките земји Летонија, Литванија и Естонија вчера соопштија дека нивните министри нема да присуствуваат на Самитот на ОБСЕ во Скопје поради учеството на Лавров.
„Присуството на Лавров носи ризик да се даде легитимитет на агресорот Русија како законски член на нашата заедница на слободни нации, да ги банализира ѕверските злосторства што Русија ги направи, како и очигледното руско кршење и презир на основните принципи и обврски на ОБСЕ“ се наведува во заедничката изјава на министрите за надворешни работи на трите балтички земји.
Покрај нив, и украинскиот министер за надворешни работи Дмитро Кулеба објави дека нема да биде дел од Самитот. Како што соопшти украинското Министерство за надворешни работи, присуството на руската делегација на средбата на министерско ниво за првпат од почетокот на руската целосна инвазија на Украина само ќе ја продлабочи кризата во која Русија го воведе ОБСЕ.