Косовскиот премиер Албин Курти повторно ја отвори темата за положбата на Албанците во Прешевската Долина, обвинувајќи ги српските власти дека со години спроведуваат системски притисок врз локалното население, пишува „Анадолу“.

Според Курти, преку административни мерки и таканаречената „пасивизација на адресите“, голем број Албанци во Прешево, Бујановац и Медвеѓа постепено се бришат од системот и остануваат без дел од основните граѓански права.

Тој оцени дека станува збор за форма на „административно етничко чистење“, тврдејќи дека луѓето губат право на глас, здравствено осигурување, социјална заштита и можности за вработување поради административни процедури што ги спроведуваат српските институции.

Курти воедно порача дека положбата на Албанците во Јужна Србија не може да се спореди со правата што ги ужива српската заедница во Косово, која има гарантирана институционална застапеност, локална самоуправа и политичка поддршка.

Прашањето за бришењето на адресите со години е една од најчувствителните теми меѓу Приштина и Белград. Албанските политички претставници тврдат дека со оваа практика илјадници луѓе практично се отстрануваат од избирачките списоци и се оттурнуваат од институционалниот систем.

Српските власти и претходно ги отфрлаа ваквите обвинувања, тврдејќи дека станува збор за редовни административни проверки и законски процедури, а не за етнички мотивирани мерки.

Изјавата на Курти доаѓа во чувствителен политички период за Косово, во време кога земјата повторно влегува во фаза на политички пресметки и подготовки за нови изборни процеси. Во таков амбиент, темите поврзани со Србија, северот на Косово и положбата на Албанците во Прешевската Долина повторно добиваат силно место во јавниот дискурс.

Дел од регионалните аналитичари оценуваат дека ваквите пораки имаат и внатрешнополитичка тежина, бидејќи националните и безбедносните теми традиционално играат важна улога во мобилизацијата на гласачкото тело во Косово.

Косово влегува во криза – следуваат нови предвремени избори