Главниот координативен кризен штаб в понеделник ќе одржи седница на која ќе одлучи дали ќе ги прифати препораките на Комисијата за заразни болести – невакцинираните во јавниот сектор да мора или да се вакцинираат или еднаш неделно да се тестираат за да одат на работа. Како што дознава „Слободен печат“ од свои извори во штабот, на дневен ред ќе бидат и другите предложени рестрикции со кои се прави обид да се зголеми вакциналниот опфат, меѓу кои и задолжителна вакцинација за здравствените работници.

Мерките кои вчера ги предложи Комисијата за заразни болести ќе почнат да се спроведуваат 10 дена откако ќе бидат изгласани на владина седница. За контрола на вакциналниот и ковид статусот на административците задолжен ќе биде редар поставен од секоја институција.

Слични рестрикции за вработените во јавниот сектор има Хрватска од каде што се копирани и македонските предлози.

Откако министерот за здравство Венко Филипче најави дека ќе се воведува задолжително тестирање на сметка на вработените административци со ПЦР тест на секои 72 часа, бројни работнички синдикати се јавија со поделени реакции и ставови. Сојузот на стопански комори пак, ја прифати иницијативата и сугерираше истите проверки да се прават и во приватниот сектор за да се обезбеди сигурен производствен процес.

Нема спас додека невакцинираните не се удрат по џебот!