По серијата пожари што вчера зафатија неколку локации на територијата на Општина Ѓорче Петров, Општинскиот кризен штаб утрово одржал состанок на кој биле разгледани настаните и биле донесени конкретни заклучоци за унапредување на координацијата и реакцијата при идни интервенции.

Од Општината информираат дека во услови на силен ветер и отежнати временски услови, благодарение на навремената интервенција и целосната ангажираност на сите служби, пожарите биле локализирани без човечки жртви и со минимални материјални штети.

Во текот на целиот ден бев на терен и лично сведочев на пожртвуваноста и организираноста на сите служби, како и на храброста и солидарноста на нашите сограѓани. Ѓорче покажа дека знае да се справи кога е најтешко. Сите заедно, како едно, изјави градоначалникот Александар Стојкоски.

На состанокот на Кризниот штаб, како што велат од Општината, биле донесени мерки за поефикасна координација помеѓу институциите,  побрза мобилизација на ресурси на терен, како и за јасна комуникација и редовна проверка на потенцијално ризични подрачја.