Црногорскиот премиер Здравко Кривокапиќ по вчерашната историска посета на Велика Британија, каде се сретна со британскиот колега Борис Џонсон, изјави дека црногорската влада се бори против мешањето на трети страни во нивната политика, како и против заробувањето на државата.

Од друга страна, Џонсон изјави дека Обединетото Кралство ги поддржува реформските процеси во Црна Гора, како и напорите кои црногорската влада ги вложува во борбата против организираниот криминал и корупцијата, пренесува РТЦГ.

Историјски састанак са премијером Уједињеног Краљевства @BorisJohnson у Лондону. 🇲🇪 🇬🇧 pic.twitter.com/LLJLq5KrXN

— Zdravko Krivokapić (@profKrivokapic) July 7, 2021

Кривокапиќ синоќа ја заокружи дводневната посета на Британија со средбата со Џонсон, што претставува прва средба помеѓу лидери на Црна Гора и Велика Британија во историјата на двете земји.

„Оваа влада е големо разочарување за третата страна, бидејќи тие мислеа дека по изборите ќе се промени надворешната политика. Но, ова исто е голема надеж за нашите прозападно ориентирани граѓани, кои конечно после 30 години владеење на една партија имаат надеж дека оваа влада може да се избори за претходните недостатоци“ изјави Кривокапиќ.

„Ова е историски момент за нашата држава, бидејќи прв пат премиер на Обединетото Кралство има прилика да прими премиер на Црна Гора“ изјави Џонсон по состанокот.