По премиерното прикажување на Revolver Fashion Trade Show во Копенхаген, најновата колекција на сребрен накит на Котев Ксенија ќе биде претставен вечерва и пред скопската публика во „Јавна соба“. Котев повторно не остава без здив и не облева со сребро преку 21 парче накит со Rebirth.

Брилијантна во својот израз и секогаш длабоко мистична во креирањето нѐ освојува со секоја своја колекција, но овојпат доживува комплетна преродба во нејзиниот израз и дизајн.

Минимализмот се провлекува во секое нејзино парче, а сребрените нишки излегуваат од кожурецот и формираат крилја.

Станува збор за своевидно ново раѓање на Котев во оваа колекција која е составена од 3 дела, 3 групи со по 7 парчиња накит кои носат посебно име. Првата група го носи името на самата колекција Rebirth, втората група е I see butterflies и третата – Aqua.

„Излегувањето од кожурецот ја носи симболиката на живеењето и единствениот начин да ги рашириме крилјата како битија или само како вистински уживатели кон уметноста. Водата е извор на живот, но ја чисти и душата“, ни рече дизајнерката.

Колекцијата ќе биде дел од тридневниот шоу – рум од 1 до 3 октомври во организација на маестралните ONLYAFEW во соработка со Моден викенд Скопје.

Модниот викенд Скопје ќе трае три дена  и ќе претстави поинакво доживување на модата и на урбаното живеење. Диџејот Gloomié со свој музички перформанс ќе го означи и отворањето, вечерва со почеток од 19 часот, во „Јавна соба“ . Подгответе се за „Свесна Мода“.