Премиерот на Косово, Албин Курти, најави значителни финансиски награди за фудбалските репрезентативци во пресрет на бараж-натпреварите за пласман на Светското првенство. Косовската селекција денеска ѝ гостува на Словачка во полуфиналето од баражот, а евентуален триумф ќе им донесе финален дуел со победникот од натпреварот меѓу Турција и Романија.

Косовската влада веќе издвои 250.000 евра како награда за самиот пласман во баражите. Доколку репрезентацијата ја елиминира Словачка и обезбеди место во финалето, на фудбалерите им следува дополнителен бонус од 500.000 евра.

Најголемата премија е предвидена за евентуален историски пласман на Мундијалот и изнесува еден милион евра.