Амбасадорот на Соединетите Американски Држави во Косово Филип Коснет  се сретна денеска со лидерот на Движењето самоопределување (ВВ) Албин Курти, кому му честита за победата на неговата партија на вонредните парламентарни избори, одржани в недела, на 14 февруари, јави дописникот на МИА од Приштина.

Pleased to meet with @albinkurti to congratulate @LVetevendosje on its victory and discuss #Kosovo’s path forward. We urge parties to work quickly to establish a government and Assembly to serve all citizens and address pressing challenges.

— Ambassador Philip S. Kosnett (@USAmbKosovo) February 16, 2021

По средбата во седиштето на ВВ, Коснет порача дека очекува што поскоро конституирање на новото Собрание и формирање на новата Влада.

– Имав задоволство да се сретнам со Албин Курти и да му честитам на Движењето самоопределување за неговата победа и да разговараме за патот напред на Косово. Ги поттикнуваме партиите да работат брзо за да ги формираат Владата и Собранието, со цел да им служат на граѓаните и да се соочат со предизвиците, напиша Коснет на неговата официјална страница на Твитер.

Апсолутен победник на завчерашните избори е досега опозициското ВВ, со 47,88 отсто од гласовите, со тоа што се уште не се преброени гласовите на дијаспората, која традиционално на последните изборни процеси гласа за партијата на Курти, така што може да се очекува негова уште поубедлива победа.