На улицата „Козара“ во населбата Капиштец започнуваат градежните зафати за нејзината долгонајавувана реконструкција. Реконструкцијата, како што информираат од Општина Центар, ќе го опфати потегот од улицата Антон Панов па сѐ до улицата Васил Ѓоргов, бидејќи во овој дел улицата има потреба од обновување на асфалтот.

– На овој потег на улицата „Козара“ ќе биде поставен нов асфалт во должина од 1490 м2 и нови рабници со вкупна должина од 940 метри, односно по 470 метри од двете страни. Заедно со поставувањето на новиот асфалт долж овој потег на улицата, ќе бидат нивелирани и 23 шахти – вели градоначалникот Горан Герасимовски.

Жителите на Козара со години реагираат за состојбата во која се наоѓа оваа улица, на која од двете страни се градат или се изградија во изминатиот период повеќе  згради.

Од Општина Центар информираат дека веќе е започната реконструкцијата на улицата Петар Поп Арсов, а во следниот период ќе се работи на улиците Рајко Жинзифов, Адвокатска улица и на пробивањето на улицата Партизанска.