Откако директорот на „Комунална хигиена“ Сабахудин Рустеми заврши во притвор за купиштата ѓубре во Скопје, Управниот одбор на претпријатието испрати итен допис до градоначалничката на Град Скопје Данела Арсовска да назначи нов директор на претпријатието откако таа го повика Управниот одбор да именува нов директор.

-Согласно член 24, став 2, член 23 став 3 од Законот за јавните претпријатија и член 40 од Статутот на ЈП Комунална хигиена-Скопје (во прилог) исклучиво Вие како градоначалник на Градот Скопје имате ингеренции да именувате в.д. директор на ЈП Комунална хигиена-Скопје, имајќи во вид дека состојбата во Претпријатието итно го налага тоа. Би сакале да ве потсетиме и дека во текот на изминатите четири години токму Вие именувавте пет в.д.директори на ЈП Комунална хигиена-Скопје и разрешивте четири од нив – пишува во дописот.

Оттаму предупредуваат дека во моментов се при крај резервите со нафта наменета за специјалните комунални возила кои се употребуваат за собирање и транспорт на комунален отпад, што не може да се направи без потпис на В.Д. директор.

-Доколку во најкус можен рок не назначите в.д.директор на ЈП Комунална хигиена-Скопје, одговорноста за алармантната состојба со одржувањето на хигиената во градот Скопје е Ваша. Од наведените причини, Управниот одбор на ЈП Комунална хигиена-Скопје бара од вас итно да назначите нов в.д.директор кој ќе раководи со ЈП Комунална хигиена-Скопје, во насока на остварување на примарната дејност на Претпријатието, а во интерес на заштитата на животната средина и јавното здравје – се дополнува во дописот.

Приведени директорот на „Комунална хигиена Скопје“ и уште еден раководител

На него прва е потпишана претседателката на Управниот одбор Јулијана Спировска, за која Арсовска тврди дека е блиска со владејачката ВМРО-ДПМНЕ.