Комунален работник, косејќи ја тревата на јавна површина во источногерманскиот град Баневиц, во октомври пронашол 10 златни прачки, вредни десетици илјади евра, пишува ДПА.

Тој уредно го пријавил златото кај локалните власти, кои официјално го објавиле изгубениот предмет и го повикале сопственикот да се јави.

Се јавиле многу луѓе, преку повик, писмо или испраќање е-пошта, но никој не можел веродостојно да ја докаже сопственоста на златото, рекол градоначалникот Хајко Версиг.

Градската управа барала од овие луѓе да ја докажат сопственоста со сметка за купување злато, сериски броеви на златните прачки или на кој било друг веродостоен начин.

Никој не можел да го стори тоа и кога, на 17 април поминале шест месеци од огласот, златото преминало во сопственост на градот.

Собранието следната недела треба да одлучи што да прави со златото, рекол Версиг. Планот засега е неочекуваниот прилив да се пренасочи кон организации за работа со млади луѓе и зачувување на традиционалните обичаи.

Златото дотогаш го чува полицијата. Според моменталната цена, златните прачки вредат околу 40.000 евра.