Комшиќ ја обвини Хрватска за злоупотреба во иницијативите на ЕУ и НАТО за БиХ
Членот на Претседателството на БиХ, Жељко Комшиќ упати обвинувања кон Хрватска дека ја злоупотребува својата улога во ЕУ и НАТО со иницијативите за измена на Изборниот закон на БиХ и рече дека таквите потези не се поддржани од „пријателска и добронамерна Турција предводена од претседателот Реџеп Таип Ердоган“.
На прес-конференција по средбата со турскиот министер за надворешни работи Мевлут Чавушоглу, Комшиќ синоќа рече дека најмногу разговарале за односите меѓу земјите од регионот и деталите од неговата посета на Загреб и разговорите со неговиот колега Гордан Грлиќ Радман, пренесува Хина.
– Од министерот добивме уверување дека не го поддржуваат она што Загреб се обидува да го направи во однос на интервенциите во внатрешните работи, дури и во однос на Изборниот закон. Фактот што Загреб ги злоупотребува таквите средби, па дури и неговата позиција во ЕУ и НАТО, според мене е одраз на очајот на Загреб што не може да го зграпчи тој лост на моќ во Босна и Херцеговина – рече Комшиќ.
Според него, Турција не ја поддржува позицијата дека треба да се отворат преговори меѓу двата народа.
– Колку се поупорни, толку посилен ќе биде нашиот одговор. Драго ни е што ја имаме поддршката од Република Турција за таквиот став, а не за ставот што се обидоа да се покрене по тој состанок во Загреб – рече Комшиќ.
На завчерашната средба со неговиот хрватски колега во Загреб, турскиот министер за надворешни работи ја поддржа идејата за решавање на несогласувањата преку разговори меѓу Хрватите и Бошњаците во БиХ.