Шпанската актерка Естер Експосито се прослави со улогата во хит-серијата на Нетфликс, „Елита“ (Elite), а денес е препознатливо лице во светот на филмот, модата и убавината. Во последниот период таа го привлекува вниманието и поради гласините дека е во љубовна врска со францускиот фудбалер Килијан Мбапе.

Иако ниту Експосито ниту Мбапе јавно не потврдиле дека се заедно, тие во неколку наврати биле фотографирани во друштво еден на друг, што дополнително ги поттикнало шпекулациите за нивниот однос.

Родена е во Мадрид

Естер Експосито е родена на 26 јануари 2000 година во Мадрид. Уште како тинејџерка почнала да настапува во театарски претстави, а потоа ги добила и првите телевизиски улоги во шпанските серии „Визави“ (Vis a Vis) и „Клинички центар“ (Centro Medico).

Во интервју за „Опра дејли“ во 2020 година, таа раскажала колку брзо ѝ се променил животот по успехот на „Елита“.

„За две години, ‘Елита’ целосно ми го промени животот. Иако претходно веќе имав снимено два филма и учествував во други серии, успехот на оваа серија направи јасна пресвртница во мојата кариера. Сега луѓето низ целиот свет знаат која сум“, изјавила актерката.

„Елита“ ја направи меѓународна ѕвезда

Иако и претходно професионално се занимавала со актерство, нејзината најголема улога пристигнала во 2018 година, кога го добила ликот на Карла Росон во шпанската тинејџерска драма „Елита“.

Серијата стана еден од најголемите меѓународни хитови на Нетфликс, а Експосито се појави во првите три сезони, по што одлучи да се посвети на други проекти.

„Секогаш ќе бидам благодарна за она што Карла ме научи“, изјавила таа за улогата што ѝ донесе светска слава.

Во интервју за магазинот „Нумеро“ во 2023 година, актерката истакнала дека успехот на серијата се должи на сложените ликови и емоциите со кои младите гледачи можеле да се поистоветат.

„Мислам дека серијата стана дел од една генерација која ќе ја памети како серијата на своите тинејџерски години. Младите можат да се препознаат во сите спротивставени емоции што ги чувствуваат ликовите“, рекла таа.

Продолжи да ја гради актерската кариера

По заминувањето од „Елита“, Експосито се појави во повеќе телевизиски и филмски проекти. Таа глумеше во сериите „Некој мора да умре“ (Someone Has To Die), „Отров“ (Veneno) и „Бандити“ (Bandidos), како и во филмовите „Венера“ (Venus) и „Изгубени во ноќта“ (Perdidos en la noche).

На Телевизискиот фестивал во Монте Карло во 2026 година ја доби Меѓународната награда „Златна нимфа“ за најперспективен талент.

Нејзиниот следен проект е филмот „Поврзани“ (Drawn Together), адаптација на романот „Марфил“ од Мерседес Рон, чија премиера на „Амазон прајм“ е најавена за 9 септември 2026 година.

Експосито вели дека актерството било нејзин сон уште од детството.

„Уште од мала сакав да бидам актерка. Не знам зошто, бидејќи никој во моето семејство не се занимава со нешто слично. Но, како да сум родена со таа желба – отсекогаш знаев“, изјавила таа за „Вог Мексико“.

Модата е важен дел од нејзината кариера

Покрај актерството, Експосито изгради успешна кариера и во модната и козметичката индустрија. Соработувала со познати брендови како „Десигуал“, „Ив Сен Лоран бјути“, „Долче и Габана“, „Марин Сер“ и „Булгари“.

Таа ја опишува модата како „многу моќна и убава алатка за уметничко изразување“.

„Сакам да уживам и да експериментирам со неа, без да станам премногу опседната. Сакам едноставно да ми носи задоволство и нови можности“, објаснила актерката.

Ја следат повеќе од 24 милиони луѓе

Естер Експосито има повеќе од 24 милиони следбеници на Инстаграм, каде што споделува моменти од снимања, модни кампањи, патувања и лични проекти.

Сепак, таа вели дека се труди да не ја доживува социјалната мрежа како одраз на реалниот живот.

„Инстаграм го гледам таков каков што е – мал дел од мене што не треба да претставува ништо повеќе. Тоа е алатка што ми овозможува да ги споделувам моите најнови проекти и неколку моменти од животот, без да заборавам дека тоа не е реалноста“, изјавила таа.

Гласини за врска со Килијан Мбапе

Во 2026 година Експосито почна да се поврзува со француската фудбалска ѕвезда Килијан Мбапе.

Во април тие биле забележани заедно во Париз, каде што вечерале, а потоа посетиле кугларница. Неколку недели подоцна биле фотографирани на одмор на Сардинија, додека Мбапе закрепнувал од повреда на задната ложа. Во јуни наводно престојувале и на Ибица, непосредно пред почетокот на Светското фудбалско првенство.

И покрај големото внимание, ниту еден од нив досега не проговорил отворено за природата на нивниот однос. На прашање за љубовните гласини, Експосито во март кусо одговорила: „Нема ништо да кажам, но одлично сум.“

Kylian Mbappé and Ester Expósito Enjoying the summer trip 😍 pic.twitter.com/8khWuLySxd

— SenthilKumar (@itzSKoff) June 27, 2026

Не сака приватниот живот да ѝ ја засени кариерата

Актерката повеќепати зборувала за предизвиците што ги носи славата и за постојаниот интерес на јавноста за нејзиниот приватен живот.

„Од ‘Елита’ наваму, секогаш е исто кога нешто ќе се случи во мојот приватен живот. Не сакам тоа да ја засени мојата кариера“, изјавила таа за „Ле Паризиен“.

Иако ја поврзуваат со еден од најпознатите светски фудбалери, Експосито отворено признава дека не знае многу за фудбалот.

„Не знам ништо за фудбалот. Само неколкупати во животот сум била на стадион. Во мојот дом никој не гледаше натпревари на телевизија. Иако Шпанија е голема фудбалска земја, јас ја немам таа култура“, признала таа.

„Тоа е свет што допрва го откривам. Затоа почнувам да се интересирам“, додала актерката.

Не сака да остане врзана за еден жанр

Иако меѓународната слава ја стекна со младинска драма, Експосито не сака да биде препознатлива само по еден вид улоги.

„Не сакам да бидам позната само по еден жанр. Би сакала да ги истражам сите можности – колку повеќе, толку подобро“, изјавила таа.

Актерката сака и понатаму да работи во шпанската филмска индустрија, но се надева дека ќе добие можност да снима и на други јазици, особено на англиски.

Меѓу нејзините професионални желби се враќање во театарот и снимање комедија, жанр што досега немала можност подетално да го истражи.

ВИДЕО | Против Мароко Мбапе го изведе еден од најлошите пенали во кариерата