Правилното складирање на храната е важно за таа подолго да остане свежа и безбедна за консумирање, особено кога станува збор за остатоци од оброци. Иако пластичните садови се чест избор во домаќинствата, не секоја храна е соодветна за ваков начин на чување.

Посебна претпазливост се препорачува кај постарите пластични садови или оние наменети за еднократна употреба, бидејќи можат да содржат хемиски соединенија како бисфенол А. Оштетените или често загревани пластични садови исто така претставуваат ризик, особено ако во нив се чува сирово месо. Гребнатините на површината можат да станат место за развој на бактерии, па затоа е подобро сировото месо да се чува во стаклени садови.

Намирниците богати со масти, како путер, сирење, масна риба, јаткасти плодови или сосови со павлака, исто така не се препорачуваат за складирање во пластика. Одредени состојки од пластиката можат да се раствораат во мастите и да преминат во храната, што го зголемува ризикот од контаминација.

Киселата храна, како домати, цитрусни плодови, јогурт, кисела зелка или преливи за салата, може да реагира со пластичната површина и да предизвика ослободување на штетни материи. Освен тоа, ваквата храна остава дамки на пластиката, што со текот на времето дополнително го зголемува ризикот.

Како побезбедна алтернатива се препорачуваат садови од стакло, керамика или нерѓосувачки челик. Овие материјали не реагираат со храната, не ослободуваат хемикалии, полесно се одржуваат и имаат подолг век на употреба, што ги прави практичен избор за секоја кујна.