Компанијата „Кнауф” донираше облека и професионални антибактериски средства за дебарското јавно комунално претпријатие „Стандард”.

-Станува збор за 30 комплети ХТЗ опрема, односно чизми, ракавици, маски и ПВЦ облека за нашите вработени. Помошта е секако добредојдена. Заштитата и здравјето на вработените е над се, изјави Омер Цами, раководител на секторот за комунална хигиена во „Стандард” и член на општинскиот оперативен штаб.

Во меѓувреме дебарските комуналци продолжуваат со редовните активности.

Освен што редовно го подигаат отпадот, вработените на ЈКП „Стандард” се директно вклучени во дезинфекција на јавни и прометни површини, контејнери, канти и корпи за отпад низ градот, спортските игралишта и терени и миење со вода и посебно средство на улиците во градот.

Цами го повторува апелот до граѓаните да бидат посовесни и отпадот да го фрлаат во определените места за тоа и замолува да не фрлаат тврд отпад кој во оваа ситуација не може да го подигаат.