Секој ден некоја од пекарите ги зголемува цените на лебот. Најголемо зголемување, како што велат трговците, има кај белиот леб на кришки „Диме“ кој поскапе дури 5 денари – неговата доскорешна цена беше 28 денари, а сега се продава по 33 денари. Минатата недела поскапе и лебот од најголемиот производител „Жито лукс“, но за скромен 1 денар, па така белиот леб на кришки сега место 29 денари, чини 30 денари.

На зголемување на цените предупредија од мелничко-пекарската индустрија. Претседателот на Групацијата од овој сектор, Горан Малишиќ, во изјава за „Слободен печат“ уште пред еден месец алармираше дека цената на пченицата на светските берзи е драстично зголемена, цената на струјата што ја плаќаат компаниите е дури 100 проценти повисока, а има покапување и на амбалажата – за 40 проценти.

Од Асоцијацијата на земјоделци на Македонија, пак, не се согласија со најавите и веќе случените зголемувања на цените на лебот и печивата. Според нив, до крајот на годинава потребите може да се задоволат со домашната пченица која е откупена по 10,5 денари, односно по ниска цена што ја прифатиле и земјоделците, токму за да се заштити домашниот стандард.