Токио денес изрази силен протест откако кинески дипломат се закани дека ќе ја обезглави јапонската премиерка поради нејзините изјави во врска со Тајван, објави порталот Асаши.

Во објава на Икс во саботата, кинескиот генерален конзул во Осака, Сјуе Џиан – објава што подоцна беше избришана – се закани дека „ќе ја отсече оваа бедна глава без ни најмало двоумење“.

„Дали сте подготвени за ова?“, напиша кинескиот дипломат, без да ја спомене јапонската премиерка Санае Такаичи по име, но придружувајќи ја својата објава со статија за говорот што Такаичи го одржа пред парламентот во петокот.

Јапонската премиерка изјави дека вооружените напади врз Тајван би можеле да го оправдаат испраќањето јапонски воени сили – според законот за „колективна самоодбрана“ донесен во 2015 година – за одбрана на островот, кој го бара Пекинг и е под зголемен кинески воен и дипломатски притисок.

Доколку вонредната состојба во Тајван вклучува „распоредување воени бродови и употреба на сила, тоа би можело да претставува закана за опстанокот на Јапонија, без разлика како го гледате тоа“, изјави конзервативната јапонска премиерка, која ја презеде функцијата на 21 октомври, пред парламентот во петокот.

Ситуацијата со Тајван „стана толку сериозна што мора да го разгледаме најлошото сценарио“, додаде Такаичи, долгогодишен критичар на Кина.

Објавата на кинескиот дипломат на Икс беше „целосно несоодветна“, изјави во понеделник портпаролот на јапонската влада Минору Кихара.

„Остро протестиравме и побаравме итно бришење“ на објавата, рече тој, додавајќи дека е „свесен за многу други несоодветни коментари“ дадени од лицето.

Од своја страна, Такаичи во понеделник соопшти пред парламентот дека нема намера да ги повлече своите изјави и инсистираше дека тие се во согласност со претходната позиција на Токио. Сепак, таа нагласи дека сега ќе се воздржи од експлицитно повикување на конкретни сценарија.

Кога беше прашана за изјавата на конзулот, кинеското Министерство за надворешни работи рече дека Тајван е „интегрален дел од кинеската територија“.

„Кина силно ја повикува Јапонија да размисли за својата историска одговорност во врска со прашањето за Тајван (…) и да престане да испраќа погрешни пораки до сепаратистичките сили на Тајван“, изјави портпаролот на Министерството за надворешни работи Лин Џиан на редовниот брифинг за медиумите.

„Колективна самоодбрана“ е предвидена во непопуларен закон од 2015 година, кој, во теорија, им дозволува на јапонските војници да поддржат сојузник во опасност во конфликт во странство, под услов да постои јасна закана за неговиот опстанок.

Повоениот Устав на Јапонија забранува употреба на оружје на агресивен начин за решавање на меѓународни спорови.