Американскиот пратеник за климата Џон Кери денеска започна разговори со кинеските власти во Шангај, една недела пред виртуелниот самит за климата планиран од американскиот претседател Џо Бајден.

Ова е прва посета на висок функционер на администрацијата на Бајден на Кина откако новиот претседател на САД ја презеде должноста во јануари.

„Поранешниот државен секретар на САД пристигна во кинеската економска престолнина и започна разговори со кинеските власти”, соопшти американскиот конзулат во Шангај.

Бајден ги покани претседателите на Русија и Кина, Владимир Путин и Си Џинпинг на првиот голем меѓународен самит за климата.

САД се надеваат дека самитот на 22. и 23 април ќе придонесе за забрзување и продлабочување на глобалните напори за намалување на загадувањето со фосилни горива, што ја уништуваат климата.