Големо незадоволство владее меѓу фудбалерите, раководството и навивачите на Барселона, како и кај каталонските медиуми, по елиминацијата од Атлетико Мадрид во четвртфиналето на Лигата на шампиони.

Атлетико славеше со 2:0 во првиот натпревар во Барселона, додека каталонците во реваншот во Мадрид победија со 2:1, што не беше доволно за пласман понатаму. Вината за елиминацијата ја насочуваат кон судиите, Романецот Иштван Ковач и Французинот Клеман Турпан, кои ги водеа двата натпревари.

Најостра реакција имаше каталонскиот новинар Микел Блазкез, кој на социјалните мрежи напиша:

„Ковач минатата недела ја започна кражбата на Барселона, откако не го исклучи Пубиљ и избегна да додели жолти и црвени картони на играчите на Атлетико. Вечерва, Турпан ја доврши работата, игнорирајќи чист пенал врз Дани Олмо и брутален удар со копачка во лице на Фермин Лопез од страна на голманот на Атлетико, Хуан Мусо. УЕФА е мафија“, напиша тој.

Инаку, Барселона веќе во 24. минута успеа да ја анулира негативата од првиот меч, поведувајќи со 2:0 со головите на Ламин Јамал и Феран Торес.

Потоа следуваше моментот кога Фермин Лопез при пад се удри во копачката на голманот, по што Адемола Лукман намали на 2:1. До крајот на мечот, на Барселона ѝ беше поништен гол на Торес, а дополнителен удар беше и црвениот картон за Ерик Гарсија во 79. минута.

ВИДЕО | Атлетико Мадрид и ПСЖ во полуфиналето на Лигата на шампионите