Како е можно нова машина да не пере, рерната да не пече, а климата да не дува?

природен микс за перење
Фото: Профимедиа

Добар дел од апаратите за бела техника ја покажале својата маана уште првото вклучување, а откако го пријавиле дефектот, граѓаните чекале со денови на сервисерите. Многумина се соочиле со несоодветна монтажа на производот, а им бил доставен и различен квалитет на производ од понудениот, велат од ОПМ

Македонските граѓани мака мачат со новите машини за перење, шпоретите, инвертер климите и фрижидерите. Интересно е што добар дел од овие апарати за бела техника ја покажале својата маана уште првото вклучување, а откако го пријавиле дефектот, граѓаните чекале со денови на сервисерите. Многумина се соочиле со несоодветна монтажа на производот, а им бил доставен и различен квалитет на производ од понудениот!

-Најчести проблеми на потрошувачите со мобилните телефони, телевизорите и лаптоп компјутерите се скриените недостатоци, долгото чекање за сервисирање и непризнавањето на рекламациите. Што се однесува до мебелот, граѓаните конкретно се жалеа дека не бил почитуван рокот за испорака, а им бил доставен и оштетен мебел – велат за „Слободен печат“ од Организацијата на потрошувачите.

Последниве години, граѓаните се охрабрија и им се спротивставуваат и на комуналните претприја. Оттука и високите сметки за електрична енергија која потрошувачите сметаат дека не ја потрошиле, како и незадоволството од испорачаната топлинска енергија и водоводните услуги, влегле во вкупниот број на поплаки до ОПМ за 2022 година. Поплаки се нижеле и за телекомуникациските услуги, кадешто е забележано незадоволство за намалената брзина на интернетот, исклучување на телевизиските канали и дефектите на мрежата. Експертите од ОПМ нотирале и дека лани имало значителен број поплаки за туристичките услуги (откажани туристички ангажмани и незадоволство од добиените туристички услуги), сервис услугите и услугите за едукација. Севкупно од јануари до декември лани, остварени се 1.140 советувања од кои 51 отсто биле електрoнски, 41 отсто биле телефонски, а 8 отсто на Фејсбук профилот на ОПМ.

-Лани за првпат електронските пријави ги надминаа телефонските јавувања – 59 отсто. Во секој поглед граѓаните на Скопје се најактивни и од нив лани примивме дури 86 отсто од поплаките, а остатокот се од Битола, Кочани, Штип, Охрид и Тетово. Во однос на категоризицијата на поплаките од аспект на советувањето на потрошувачите, можеме да заклучиме дека најмногу потрошувачи се жалат во делот на производите – нотираат од ОПМ.

Експертите од ОПМ велат дека се зголемиле и поплаките за специјалистичките советувања (финансиски и здравствени услуги, домување и храна). Неминовно мора да се споменат проблемите со услугите од финансиските друштва, претежно за високите трошоци и висината на каматите за брзите кредити, а проблеми се јавуваа и со наплатата на камати и провизии во банките. Што се однесува до храната, потрошувачите се соочувале со купување прехранбени производи со изминат рок, производи со различна грамажа од онаа наведена на пакувањето, високи цени на прехранбените производи и производи без декларација. Кај домувањето, најчести поплаки беа за управувањето во зградите (управителите и заедници на сопственици) и наплата на заедничките трошоци. Мал дел поплаки имало и за здравствените услуги, односно за неквалитетот од добиените услуги и високата наплата за извршените прегледи.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот