По победата во последното коло од плејофот во Супер лигата дома над Тиквеш (29:22), сега сите погледи на ракометарите на ГРК Охрид се насочени кон реваншот од финалето во ЕХФ Европската лига.

По минималната победа во Унгарија од 29:28, следува реваншот против Татабања кој е закажан за 31 мај со почеток од 20.00 часот во салата „Билјанини Извори“.

Веќе сите билети се распродадени за овој спектакл, трибините ќе бидат полни, а сигурно ќе владее добра атмосфера и околу салата, играчите на тренерот Борис Ројевиќ ќе имаат голема поддршка во обидот да се испише историја за клубот и за македонскиот клупски ракомет на меѓународната сцена.

Клубот ги повикува сите навивачи, љубители на ракометот и спортот на забава која ќе почне од 17.30 часот, во фан зоната од каде може исто да се следи натпреварот во живо на лед екран.

Еден од клучните играчи во тимот на ГРК Охрид, јапонскиот интернационалец Косуке Јасухира ги сподели очекувањата пред реваншот:

– Ни следува финалето на ЕХФ Европскиот куп. Подготвени сме максимално, ќе се бориме за Охрид, заедно да испишеме историја за клубот – се зборовите на Јасухира кој постигна четири погодоци на првиот меч.