Долниот дом на јапонскиот парламент беше официјално распуштен денес по иницијатива на премиерката Санае Такаичи, која се надева дека ќе ја искористи својата популарност на предвремените избори на 8 февруари, а воедно ќе се бори и со инфлацијата, пренесува Нова.рс.

Распуштањето, кое го одлучи Санае Такаичи, која во октомври стана првата жена премиер на Јапонија, го отвора патот за предвремени парламентарни избори.

Непосредно пред распуштањето на парламентот, официјалните податоци покажаа дека инфлацијата забавила на 2,4 проценти во однос на претходната година во декември и под 3 проценти во ноември.

Забавувањето во голема мера се припишува на субвенциите за енергија доделени во декември, додека цените на храната продолжуваат да растат, а цените на оризот скокнаа за уште 34 проценти во однос на претходната година.

Цената на оризот се зголеми повеќе од двојно до средината на 2025 година.

Јавното незадоволство од инфлацијата во голема мера придонесе за падот на Шигеру Ишиба, претходникот на Санае Такаичи.

Обидувајќи се да ја смири јавноста, централната банка во ноември откри пакет стимулативни мерки од 117 милијарди евра за да обезбеди помош за домаќинствата и бизнисите, вклучувајќи субвенции и грантови.

Банката на Јапонија, која ја затегнува монетарната политика од почетокот на 2024 година за да ја ограничи инфлацијата, ја зголеми својата клучна каматна стапка во декември на највисоко ниво во последните 30 години.