Во 2024 година, Јапонките имаат највисок животен век во светот, што е четврта деценија по ред во која се на првото место, според официјалните податоци. Нивниот просечен животен век бил 87,13 години, што е мало намалување од 0,01 година во споредба со 2023 година, пренесуваат јапонските медиуми.

Очекуваниот животен век на мажите остана непроменет на 81,09 години, но нивната позиција на глобалната ранг-листа падна од петто на шесто место, објави јапонското Министерство за здравство, труд и социјална помош.

По Јапонија на глобалното рангирање за жени следуваат Јужна Кореја со 86,40 и Шпанија со 86,34. Кај мажите, Шведска се рангираше на прво место со 82,29, по што следуваат Швајцарија со 82,20 и Норвешка со 81,59, соопшти министерството.

Очекуваниот животен век и за мажите и за жените се намали во 2021 и 2022 година, главно поради влијанието на пандемијата Ковид-19, но се подобри во 2023 година.