После 15 часот притворената поранешна специјална обвинителка Катица Јанева ќе биде пуштена од болницата „Жан Митрев“ и повторно ќе биде вратена во притворското одделение во истражниот затвор „Скопје“. Ова за „Слободен печат“ го изјави адвокатката на Јанева, Ирена Фрчкоска.

Фрчкоска рече дека денеска го добиле од ОЈО обвинителниот акт против Јанева. Минатата недела ОЈО го поднесе обвинението каде Бојан Јовановски е првообвинет, а Катица Јанева е третообвинета. ОЈО тогаш бараше да и биде продолжен притворот на Јанева.

Скопска Апелација денеска одлучи дека Кривичниот суд повторно треба да одлучува дали Катица Јанева ќе биде пуштена од притвор со гаранцијата од недвижност во три стана.

Апелација го укинала решението на Кривичниот суд со кое се одбива гаранцијата бидејќи Основниот суд не требало да го отфрли барањето на Јанева, туку требало мериторно, требало да ги разгледува околностите дали барањето за замена на затворскиот притвор е основан, па потоа да го одбие или да го прифати тоа барање.