Македонската алпска скијачка Јана Атанасовска продолжува да испишува нови страници во домашното скијање, откако на ФИС трките во словенечка Рогла постигна одлични резултати.

На првата трка Атанасовска заврши на четвртата позиција, при што особено се истакна во второто возење, каде имаше второ најбрзо време, со заостанување од само 0,09 секунди зад победничката Ноа Шолош. Овој резултат ѝ донесе 33,20 ФИС поени што е најдобар учинок досега за една македонска скијачка во оваа дисциплина.

Континуитетот на добрата форма го потврди и на втората трка во Рогла, каде во силна конкуренција се пласираше на седмото место и освои вкупно 39,99 ФИС поени.

Овие настапи се уште една потврда за напредокот на македонското алпско скијање, а Атанасовска, заедно со тренерот Александар Атанасовски, јасно покажува дека е на вистинскиот пат кон поголеми успеси и натпреварување со светската елита.