Во Холивуд ретко се случува некоја актерка истовремено да биде симбол на интелигенција и добитничка на најпрестижните награди. Но, Натали Портман никогаш не била типична холивудска ѕвезда.

Денес таа зад себе има повеќе од три децении кариера, Оскар, диплома од Харвард и десетици незаборавни улоги. Но, патот до успехот бил исполнет со необични одлуки, жртви и предизвици.

Од девојче од Ерусалим до светска ѕвезда

Натали Портман е родена како Натали Хершлаг на 9 јуни 1981 година во Ерусалим. Кога имала три години, семејството се преселило во Соединетите Американски Држави, каде што го поминала најголемиот дел од детството.

На десетгодишна возраст агент на познат козметички бренд ја забележал во пицерија и ѝ понудил да стане детски модел. Наместо тоа, Натали одлучила да се обиде како актерка. Само неколку години подоцна ја добила улогата во филмот „Леон: Професионалецот“ (Léon), која ја вивна меѓу најталентираните млади актерки во Холивуд.

Светската слава дојде со улогата на Падме Амидала во „Војна на ѕвездите“ (Star Wars), но токму тогаш Портман покажа дека не размислува како повеќето млади ѕвезди.

Ја пропушти премиерата на „Војна на ѕвездите“ поради училишен испит

Во 1999 година милиони обожаватели нетрпеливо ја очекуваа премиерата на „Војна на ѕвездите: фантомската закана“. Иако беше една од главните ѕвезди на филмот, Натали не се појави на свечената премиера.

Причината била едноставна – следниот ден полагала завршни средношколски испити и не сакала ништо да ја одвлече од учењето.

Набргу потоа се запишала на престижниот Универзитет Харвард, каде што дипломирала психологија. Во тој период значително го намалила бројот на улоги и се посветила на студиите. Учествувала и во научни истражувања, а уште како средношколка била коавтор на научен труд.

Нејзината изјава од тоа време стана легендарна: „Повеќе би сакала да бидам паметна отколку филмска ѕвезда.“

Улогата што речиси ја исцрпи до крај

Иако веќе беше познато име во филмската индустрија, вистинската актерска круна ја доби со „Црниот лебед“ (Black Swan).

За улогата на балерина која полека ја губи контролата врз својот живот, Портман тренирала балет од пет до осум часа дневно во текот на шест месеци. Ослабела околу девет килограми и поминала низ исклучително напорен физички и психолошки процес.

Жртвата се исплатела. Во 2011 година го освои Оскарот за најдобра актерка и се вброи меѓу најголемите филмски имиња на својата генерација.

Токму за време на снимањето на „Црниот лебед“ го запознала францускиот кореограф Бенжамен Милпје, кој работел на кореографијата на филмот. Нивната љубовна приказна изгледала како холивудска бајка – се венчале во 2012 година и добиле две деца.

Љубовен удар и нов почеток

По повеќе од една деценија брак, во 2023 година се појавија информации дека Милпје имал вонбрачна врска. Иако двајцата никогаш јавно не зборуваа за наводите, во 2024 година нивниот брак официјално заврши со развод.

Натали успеа да го преброди и тој тежок период далеку од скандали и јавни препукувања. Наместо тоа, продолжи да работи, да продуцира филмови и да се грижи за своето семејство.

Во 2026 година, Портман повторно се најде во центарот на вниманието кога објави дека го очекува своето трето дете на 44-годишна возраст.

Кој е Французинот на чиј шарм падна Натали Портман?