Поп-ѕвездата Кети Пери вечерва подготвува специјално изненадување за свеченото отворање на Светското првенство. Таа ќе настапи на церемонијата на стадионот „СоуФај“ во Лос Анџелес, а на сцената нема да биде сама.

Пери откри дека ќе ја изведе песната „Wonder“ од нејзиниот албум „143“ од 2024 година. Во песната гостува младиот Норвежанец Тиус, кој својот вокален дел го снимил уште во 2021 година, кога имал само пет години.

„Тиус го сними својот дел за ‘Wonder’ кога имаше пет години, во 2021 година“, напиша Пери покрај видеото објавено на социјалните мрежи, на кое се гледа како двајцата пристигнуваат на стадионот.

„Тиус сега има 10 години и допатува од Норвешка во Лос Анџелес за вечерва заедно со мене да ја изведе оваа песна на Светското првенство.“

Пејачката неодамна зборуваше и за изборот на песната на фестивалот „Трајбека“ во Њујорк, каде присуствуваше на премиерата на својот концертен филм „Кети Пери: турнејата Лајфтајмс, во живо од Париз“.

„Песната што ќе ја пеам е многу соодветна за ваква свеченост“, изјави Пери, додавајќи дека досега никогаш не ја извела во живо.

„Навистина сум возбудена што конечно ќе ја отпеам пред публика“, рече таа.

Светското првенство 2026 официјално започна вчера со натпреварот меѓу Мексико и Јужна Африка во Мексико Сити. На турнирот учествуваат 48 репрезентации од целиот свет, а финалето е закажано за 19 јули.

Првата церемонија на отворањето во Мексико Сити вклучи настапи на Алехандро Фернандез, Белинда, Дени Оушн, Џеј Балвин, Лила Даунс, Лос Анхелес Азулес и групата „Мана“. Посебно внимание привлекоа Шакира и Бурна Бој, кои премиерно ја изведоа „Dai Dai“, официјалната песна на турнирот.

Втората церемонија ќе се одржи денес во Торонто, каде ќе настапат Аланис Морисет, Алесија Кара, Џеси Рејез, Мајкл Бубле и други музички имиња.

Подоцна во текот на денот, на американската сцена покрај Кети Пери ќе настапат и Фјучр, Анита, Лиса, Рема и Тајла.

Нова песна што никогаш не ја отпеала во живо

Настапот на Кети Пери доаѓа по успешната турнеја „Лајфтајмс“, која заврши кон крајот на 2025 година. На неа таа ги изведуваше песните од албумот „143“, како и некои од своите најголеми хитови, меѓу кои „California Girls“, „I Kissed a Girl“, „Roar“ и „Firework“.

По премиерата во Њујорк, нејзиниот нов концертен филм „Кети Пери: турнејата ‘Лајфтајмс’, во живо од Париз“ треба да почне да се прикажува во кината подоцна ова лето.

Споредувајќи ја турнејата „Лајфтајмс“ со документарниот филм „Дел од мене“ (Part of Me) од 2012 година, кој ја следеше за време на турнејата „Калифорнија дримс“, пејачката изјави:

„Тој филм беше повеќе документарец за мојот живот, а ова е вистинско концертно искуство на највисоко ниво за моите обожаватели. На крајот на краиштата, сето ова го правам за нив, бидејќи токму тие ме поддржуваат повеќе од 18 години.“

Како песна стара 15 години стана неофицијална химна на Босна и Херцеговина пред Светското првенство?