Израелската армија ранила 24 Палестинци, меѓу кои и 13-годишно момче, кое било застрелано во главата, додека демонстрантите фрлаа камења и запалија гуми на протестите во Појасот Газа.

Американските медиуми пренесуваат дека стотици лица учествуваа во демонстрациите, кои станаа насилни откако десетици луѓе се приближија кон утврдената гранична ограда, запалија гуми и фрлаа камења врз израелските војници кои испукаа солзавец, а потоа и пукаа врз демонстрантите.

Министерството за здравство во Газа, со кое раководи Хамас, објави дека во израелското пукање се ранети 24 Палестинци, од кои двајца, меѓу кои и едно 13-годишно момче, се во критична состојба.

Во соопштението, израелската армија наведе дека војниците одговориле со боева муниција, откако стотици Палестинци насилно демонстрирале на границата меѓу Газа и Израел.

Израел во четвртокот објави дека постигнал договор со Катар земјата да продолжи да плаќа помош за илјадниците семејства во Појасот Газа, што е чекор насочен кон намалување на тензиите на палестинската територија што е под контрола на Хамас.

Катар во послендите години обезбеди стотици милиони долари за најсиромашните семејства во Газа и тие средства беа клучен извор на стабилноста во оваа сиромашна територија, каде што невработеноста се движи околу 50 проценти, прен есуваат американските медиуми.

Извор: МИА