Изложбата „Колаж на еден разурнат град“ е поставена во Музејот на град Скопје

Збирката разгледници од старо Скопје од фондот на Музејот на град Скопје е основата за подготовка и поставување на изложбата „Колаж на еден разурнат град“, која беше отворена на 26 јули по повод 58 години од катастрофалниот земјотрес во Скопје.

Збирката содржи разгледници од крајот на 19-ти до крајот на 20 век, додека во фокусот на изложбата се разгледници – колажи што се карактеристични по мотивите и темите инспирирани од земјотресот. Подеталната анализа на разгледниците колажи наведува на три основни групи.

Една група се црно-бели и колор разгледници издадени набргу по земјотресот во кои е претставен градот со мотиви од првите мигови по земјотресот, со напоредни фотографии на исти локации пред и по 26 јули 1963 година.

Во втората група се изложени разгледници – колажи издадени по повод меѓународната манифестација „Средба на солидарноста“, која се одржувала во годините по земјотресот.

Во третата група се поместени колор разгледници – колажи издадени кон крајот на 60-тите години со претстави на разурнатото и на новото Скопје. Авторка на изложбата е кустосот советник историчар Зоја Богдановска. Каталогот и изложбата се реализирани со поддршка на Град Скопје.

(Текстот е објавен во „Културен печат“ број 91, во печатеното издание на „Слободен печат“ на 31 јули – 2 август 2021)

Видео на денот