Писателката Милена Лунеска (Кичево, 1963), која по занимање е економист и долги години работи како раководител на семејна фирма, неодамна го објави својот најнов роман „Добро утро, љубов!“ во издание на „Збор“.

Приказната во романот се врти околу младата и успешна Дарија, која се враќа од Германија во родната Македонија и во својот роден град за да направи едно добро дело. Но, со враќањето, ги носи и своите куфери полни со тажни спомени, кои не ѝ дозволуваат да продолжи со животот онака како што таа посакува.

– „Добро утро, љубов!“ е најмалку љубовен роман. Тоа е дело посветено на болката, на несреќната љубов, на повредените чувства и на изневерената доверба – забележува рецензентот Срѓан Ивановиќ, кој во својот текст за книгата заклучува дека тоа е „роман што ѝ е потребен на македонската белетристика и еден од ретките во кој успешно е опишан менталитетот на обичниот човек, што е успех само по себе. Во претпоставената борба на доброто и злото, Лунеска ќе ве увери дека, всушност, никој не е зол, туку природата на нештата го води животот во непредвидлив правец, кој ни малку не е лесен. Животот го прават луѓето, а тие се несовршени, полни со љубов. Од друга страна, љубовта ја носи со себе страста која тешко може да се заборави. Но, како што и по најтемната ноќ зазорува зората, така и во најтешките мигови за една напатена душа, настапуваат денови на љубов и на среќа“.

Претходно објавени романи на Милена Лунеска се „Два часа“, „Исчистени души“ и „Ќерката на премиерот“, а покрај проза пишува и поезија.

(Текстот е објавен во „Културен печат“ број 101, во печатеното издание на весникот „Слободен печат“ на 16-17 октомври 2021)