Основното обвинителство на привремените институции во Косовска Митровица им одреди мерка притвор до 48 часа на 34 претседатели на избирачки места под негова надлежност, кои се осомничени за кривично дело фалсификување на резултатите од гласањето на парламентарните избори во Приштина одржани на 28 декември, објави Еуроњуз.

Портпаролот на Основното обвинителство во Митровица, Ваљон Претени, изјави дека притворот е одреден по сослушувањето на осомничените.

Основното обвинителство во Митровица претходно денес издаде наредба до косовската полиција да ги испраша 43 претседатели на избирачки места во јужните и северните делови на Косовска Митровица, Лепосавиќ, Зубин Поток и Звечан, поради сомневања за манипулации при броењето на гласовите.

Централната изборна комисија (ЦИК) во Приштина во саботата, по завршувањето на пребројувањето на гласовите, ги објави конечните резултати од изборите одржани на 28 декември, но не го одобри објавувањето на конечните резултати за Српската листа (СЛ), бидејќи двајца членови на ЦИК од Самоопределување гласаа против.

Српска листа нагласи дека одлуката на ЦИК да не ги објави конечните резултати од изборите на Српската листа е срамна и антисрпска и најави дека партијата ќе поднесе жалба.

Конечните резултати беа објавени по пребројувањето на гласовите на сите 2.557 избирачки места во Косово и Метохија.

Пребројувањето утврди разлики во бројот на освоени гласови од кандидатите на партиите за пратеници, при што најголемите несовпаѓања се кај Демократската партија на Косово.

Поради сомнение за учество во фалсификување на резултатите од гласањето, на 28 лица им е изречена мерка притвор од 30 дена во Призрен, а на 15 лица во Малишева.