Иванов и Чомовски за Димитров: Џентлмен се раѓа, не се создава – наместо да се самопромовира, се закопа засекогаш
Новинарите Александар Чомовски, Зоран Иванов и Џелал Незири вечерва на ТВ 24 меѓудругото дебатираа и денешниот настап на вицепремиерот за економски прашања Никола Димитров кој нема да биде дел од новата влада на мандатарот Димитар Ковачевски па денеска ја нападна политиката на владата и на колегата од МНР Бујар Османи.
Новинарот Александар Чомовски во емисијата 24 анализа истакна дека со презентираната реторика, Димитров наместо да се самопромовира за идна позиција, тој се закопал засекогаш.
– Настапот на Димитров е егоцентричен што е составен дел на неговиот карактер на самобендисан политичар. Неговиот настап денеска во обид да го засече кандидатот и владата има далекусежни реперкусии. Димитров се доближува со ставовите до старото јадро на ВМРО-ДПМНЕ – рече Чомовски.
Тој додаде дека со нападот на Османи Димитров извршил напад на основните постулати на македонскиот мултиетнички пристап.
-Шефот на дипломатијата не води надворешни политики со лични свои погледи. Има начини кога се усогласува. Ако тој е голем патриот и македонист, на кого му одговара овој момент на затегнување на односите со Бугарија со таква реторика, кога ни претстои средбата Ковачевски-Петков. Тој сака да влезе во ритамот на кој не го сака Договорот за добрососедство. Србија и Русија не го сакаат. После ваков настап би се сомневал што тој мисли, иако сите велат дека тој е американски ученик и експозитура на американската дипломатија, оцени новинарот Чомовски во емисијата „24 анализа“.
Новинарот Зоран Иванов смета дека денешниот настап на вицепремиерот Никола Димитров е карактерна бомба.
-Не може да се глуми џентлмен цел живот. Може година, две, 20, но кога ќе ве погоди нешто како суета, тогаш паѓа и тој атрибут на џентлменство. Џентлмен се раѓа, не се создава. Денеска мислам дека Димитров го спушти нивото каде што никој не очекуваше. Требаше да излезе на прес и да каже „граѓани јас земјава ја внесов во НАТО“, но наместо тоа отиде во друга реторика. Ова ќе му пречи во иднина. Тој не доби поддршка од никого и не верувам дека ќе може да формира своја партија, вели Иванов во гостувањето на емисијата „24 анализа“.