Италијанскиот министер за здравство Сперанца: Бележиме први знаци на забавување на растот на ковид-19
Во Италија деновиве се забележуваат првите знаци на забавување на вртоглавиот раст на инфекциите со ковид-19, но ситуацијата и натаму е многу сериозна, а приливот на нови пациенти во болниците е сè уште голем и покрај ограничувачките мерки што се воведени, изјави италијанскиот министер за здравство, Роберто Сперанца.
Бројот на нови случаи на инфекција во последните 24 часа е за, речиси, 6.000 помалку од претходниот ден, вкупниот број на заразени изнесува 28.337, а бројот на смртни случаи е намален на 562, што е за сто помалку од претходниот ден.
Владиниот научен и технички комитет, тело што ја следи и анализира епидемиолошката состојба во земјата, предупредува дека трет бран на ковид-19 може да ја погоди Италија во јануари.
– Ние сме подобро подготвени за борба против инфекцијата отколку во март, но не смееме да го намалиме нашето внимание на кој било начин, бидејќи тоа може да биде катастрофално, изјави министерот Сперанца за ТВ РАИ, одговарајќи на шпекулациите дека владата може да ублажи некои од воведените ограничувања.