Италија купи редок портрет насликан од барокниот мајстор Караваџо за 30 милиони евра
Италија купи редок портрет насликан од барокниот уметник Караваџо за 30 милиони евра, една од највисоките суми што некогаш ги платила државата за уметничко дело, соопшти италијанското министерство за култура, пренесува Би-би-си.
Препорачано
Насликано околу 1598 година, делото го прикажува монсињор Мафео Барберини, влијателен свештеник кој подоцна станал папа Урбан VIII, еден од големите покровители на уметноста во своето време.
Делото било во приватна фирентинска колекција и му се припишувало на Караваџо во 1963 година. Беше јавно изложено за првпат во 2024 година во Палацо Барберини во Рим, а сега ќе се приклучи на постојаната колекција на музејот.
– По повеќе од една година преговори, денес го објавуваме стекнувањето на… извонредното ремек-дело од Караваџо – рекол министерот за култура Алесандро Џули.
Тој го опиша купувањето како дел од поширок напор за зајакнување на јавното културно наследство на Италија и спречување на исчезнување на важни дела во приватни колекции. Аквизицијата доаѓа еден месец откако Министерството за култура го купи „Ете го Човекот“ од Антонело да Месина за 14,9 милиони долари, обезбедувајќи ретко дело од ренесансниот мајстор од 15 век, токму кога требаше да се продаде на аукција во Њујорк.
Караваџо, чие вистинско име е Микеланџело Мериси, беше мајстор на техниката кјароскуро што ги прави неговите фигури да изгледаат како да оживуваат. Починал во 1610 година во доцните 30-ти години по бурен живот.
Сликата на идниот папа Урбан VIII е еден од ретките преживеани портрети насликани од Караваџо, а другите се изгубени или уништени. Само околу 60 слики низ целиот свет му се припишуваат на Караваџо, а многу прикажуваат религиозни наративи. Портретот на Барберини прикажува брадест свештеник како седи и навидум дава инструкции со суптилен гест на десната рака.
Министерството за култура објави дека ќе се обиде да купи повеќе уметнички дела во наредните месеци „со цел да им стави на располагање на научниците и ентузијастите одредени ремек-дела од историјата на уметноста кои инаку би биле наменети за приватниот пазар“.
