Истражување: Општина Охрид најдобро рангирана според Индексот на отвореност на локалните самоуправи
Општината Охрид најдобро котира на листата со Индексот на отвореност на единиците на локалната самоуправа за тековната 2020 година. Тоа го покажуваат резултатите од истражувањето спроведено од Фондацијата за интернет и општество „Метаморфозис” во соработка со УСАИД за проценка на владеење во единиците на локалната самоуправа во Република Северна Македонија со фокус врз четири принципи и тоа пристапност, ефикасност, интегритет и транспарентност.
Според истражувањето, Општина Охрид бележи висок процент на исполнителност во сите четири принципи, а најдобри резултати има во делот на транспарентноста на организациски информации, јавни набавки, буџет и јавните консултации.
На регионалната онлајн презентација на Извештајот посветена на Општина Охрид присуствуваше и градоначалникот Константин Георгиески кои истакна дека во текот на работењето Општина Охрид постојано се стреми да достигне високо ниво на транспарентност и максимално да го почитува принципот на отвореност со тоа што редовно се споделуваат сите информации кои се во интерес на јавноста и редовно се информираат граѓаните за сите детали од работењето. Според него, Општината ќе ги прифати сите забелешки и заклучоци што произлегуваат од Истражувањето и ќе ги спроведе сите мерки за подобрување по одредени параметри на транспарентноста.