Иран и САД се договорија за условен двонеделен прекин на огнот, во текот на кој ќе биде дозволен поморскиот сообраќај низ Ормускиот Теснец, објави „Би-би-си“.

Ова доаѓа повеќе од еден месец откако САД и Израел започнаа координирани напади врз Иран, и само неколку часа откако американскиот претседател Доналд Трамп вчера се закани дека „целa цивилизација ќе умре вечерва“ ако Иран не го отвори повторно Теснецот.

Пакистанскиот премиер Шехбаз Шариф, кој посредуваше во преговорите, денеска утрината изјави дека прекинот на огнот стапил на сила веднаш.

Еве што се знае досега за договорот.

Што изјавија САД и Иран?

Трамп рече дека се согласил „да го суспендира бомбардирањето и нападите врз Иран за период од две недели“ ако Техеран се согласи повторно да го отвори Ормускиот Теснец, витална поморска рута за нафта и други извозни стоки од Заливот.

Во објава на „Трут сошал“, Трамп рече дека се согласил на привремениот прекин на огнот затоа што „веќе ги исполнивме и ги надминавме сите воени цели“.

Ова следува откако тој претходно предупреди дека САД би можеле да го „збришат“ Иран „за една ноќ“ и дека „целa цивилизација ќе умре вечерва, никогаш повеќе да не се врати“ — закани што предизвикаа осуди од генералниот секретар на Обединетите нации и од Папата.

Иран се согласи да дозволи бродовите да минуваат низ Ормускиот Теснец две недели, а нивниот премин ќе биде координиран од иранската војска.

Земјата издаде и план од 10 точки, кој, меѓу другото, вклучува целосен прекин на војната во Иран, Ирак, Либан и Јемен; „целосна посветеност“ на укинување на санкциите против Иран; ослободување на иранските средства и замрзнатите активи што ги држат САД; и „целосна исплата на компензација за трошоците за обнова“ на Иран.

Во него, исто така, се наведува: „Иран целосно се обврзува дека нема да настојува да поседува нуклеарно оружје“.

„Њујорк тајмс“: Иран објави план од 10 точки за мир пред истекот на ултиматумот на Трамп

„Победата на Иран на теренот ќе биде зацврстена и во политичките преговори“, се вели во соопштението на Врховниот совет за национална безбедност на Техеран.

Според Шариф, прекинот на огнот ќе стапи во сила и во Либан, каде што Израел вели дека се бори против милитантната група Хезболах, поддржана од Иран.

Израелското раководство тврди дека нема да го напушти Либан додека заканата од Хезболах не биде отстранета.

Нема никаква назнака од Израел дека се согласил да ги запре своите операции во Либан или на друго место.

Што соопшти Израел?

Сирени се огласија во Израел кратко по објавата на Трамп, при што Израелските одбранбени сили соопштија дека пресретнуваат ракети лансирани од Иран.

Неколку силни експлозии се слушнале во Ерусалим доцна во вторникот вечерта.

–Израел ја поддржува одлуката на претседателот Трамп да ги суспендира ударите врз Иран за две недели, под услов Иран веднаш да ги отвори теснеците и да ги запре сите напади врз САД, Израел и земјите во регионот – изјави израелскиот премиер Бенјамин Нетанјаху неколку часа откако Трамп го објави прекинот на огнот.

Тој додава дека „прекинот на огнот не го вклучува Либан“, каде што Израел има копнени сили.

Не е јасно колку Нетанјаху бил вклучен во одлучувањето на Трамп.

Што следува?

Пакистан, кој посредуваше во преговорите, ги покани делегациите да се сретнат во Исламабад во петок „за понатаму да преговараат за конечен договор за решавање на сите спорови“.

Портпаролката на Белата куќа, Каролин Левит, потврди дека се водат разговори за средби лице в лице, но рече дека „ништо не е конечно сè додека не биде објавено од претседателот или од Белата куќа“.

Војната со Иран го менува туризмот: Европа во добивка