Ксенија Николова, авторка и креаторка на содржини преку своето пишување, визуелни проекти и активности на социјалните мрежи, гради препознатлив уметнички израз. Таа во моментот работи на нов роман, а инспирацијата ја црпи од секојдневието, литературата и личните искуства. Во интервјуто за „Слободен печат“ зборува за пишувањето, видеата на Инстаграм, модата, како и за предизвиците и навиките кои го обликуваат нејзиниот живот и работа.

Лето е… дали и за тебе совршениот одмор значи плажа, книга и мир? Што читаш во моментов и имаш ли книга што би ја препорачала како задолжително четиво што секој треба барем еднаш да го прочита?

– Совршениот одмор е таму каде што душата се одмора, мислите се бистрат и создаваме спомени. Каде и да е тоа, важни ми се овие нешта. Што се однесува на книгите, моментално го пишувам мојот нов роман и веќе сум влезена во приказната, а тоа значи дека нема простор за други приказни, таков е мојот креативен процес. Книга што би ја препорачала… хм, навистина има толку многу книги што треба да се прочитаат и писатели и писателки што оставиле силен печат на мојата душа, Достоевски, Хемингвеј, Шарлот Бронте, Вирџинија Вулф, Горан Стефановски, Дејан Дуковски…

Од каде се роди љубовта кон пишувањето?

– Пишувањето отсекогаш било дел од мене, не се работело за одлука, туку за природен порив што сум го чувствувала. Пишувањето е моето дишење, не би знаела како да опстојам без тој канал низ кој течат моите најдлабоки емоции. Кога е нешто впечатено во нашето јадро, тогаш се работи за повеќе од љубов, се работи за идентитет и призма низ која се доживува животот. Јас секогаш ќе бидам раскажувач, зборовите секогаш ќе ми се плетат на чудесен начин и во сите нешта околу мене јас секогаш ќе гледам приказни кои ме движат и сакам да ги раскажам.

Освен книгите, посебно инспирираат твоите видеа на Инстаграм, во кои спојуваш моќни пораки, музика и впечатлив моден стил. Колку ти е важно визуелното изразување и дали сметаш дека понекогаш едно видео може да пренесе емоција исто толку силно колку и една книга?

– Технологијата ни нуди платформи и можности нашата порака, нашата уметност и нашите приказни да патуваат и да се трансформираат низ разни форми. Визуелното изразување отсекогаш ме инспирирало и сметам дека на тој начин пишаниот збор се оживува низ повеќе димензии. Оттаму дојде и идејата за некои мои текстови да ги кажувам на сцена, движејќи се, а тоа да се претвори во кратко видео. Секогаш творам од истото место во моето срце, без разлика каква е крајната форма и сметам дека публиката тоа го препознава.

Секогаш изгледаш беспрекорно средено и со препознатлив стил. Дали модата е твоја пасија и колку внимание посветуваш на изборот на секој аутфит?

– Благодарам, ми значи. Кога имам здрав и квалитетен однос со себе, мојот живот е подобар и јас сум посреќна. Сакам да се негувам, себеси, својот стил, важно ми е да растам и да ја развивам својата естетика. Мојот стил е минималистички и бирам парчиња кои ќе ми траат и во кои се пронаоѓам на подолги патеки. Одамна ги надраснав моменталните трендови во секоја смисла на тој збор, како во стилот, така и во сите други димензии на животот.

Твоите книги допреа до многу читатели, особено жени што се пронаоѓаат во твоите зборови. Кој коментар или порака од читател ти останал најдлабоко во срцето?

– Моите читатели постојано комуницираат со мене и често споделуваат дека моите книги им промениле нешто во животот. Во суштината, уметноста е движечка сила и нема поголема радост за мене кога ќе сфатам дека тоа што сум го создала со моите две раце, ги движи луѓето, им значи и ги допира, толку искрено и силно, што веќе станува нивно.

Јавно зборуваше за предизвиците низ кои си поминала со менталното здравје. Што би им порачала на луѓето што денес се соочуваат со слични искушенија?

– Секогаш ќе го користам мојот глас за да ги туркам бариерите барем малку понапред и да бидам дел од разговорот што мене ми беше најпотребен кога минував низ моите тешки периоди. Пораката е јасна, не сме сами и да се бара помош е многу, многу важно. Предизвиците се надминуваат и потоа се претвораат во нешто што засекогаш го менува нашиот живот, и честопати, кон подобро.

Кога не пишуваш и не создаваш содржини за социјалните мрежи, како изгледа еден сосема обичен ден на Ксенија Николова?

– Станувам рано, го пијам моето кафе, вежбам, поминувам време со најблиските, со моите мачки, се дружам со природата, гледам филмови, одам во театар, слушам музика и ја набљудувам Месечината.

Кога би можела да ѝ испратиш една порака на Ксенија од пред десет години, што би ѝ рекла?

– Мораше да биде вака, а еден ден ќе сфатиш зошто. Сè е за тебе, мила моја.

Интервју со актерот Петар Стојанов: Еден поглед од Емра беше доволен, сè друго е историја

Интервју со Валентин Петрески, ТВ-водител: Како и во кујната, така и пред камера, не одам по правила, туку по свој рецепт