Јован Јованов сподели убав семеен момент со своите следбеници на социјалните мрежи поврзан со ќерка му Малеа.

Тој објави фотографии од свеченоста по повод полуматурата на неговата ќерка, која живее и се школува во Канада каде што Јованов се пресели пред повеќе од 10 години.

Јован гордо покажа дека неговата ќерка успешно завршува едно важно поглавје од образованието и чекори кон нови предизвици. На фотографиите Малеа блеска со насмевка и елегантен изглед, додека покрај неа е гордиот татко.

Јованов до скоро беше во Македонија, по повод заедничкиот концерт кој го одржа со Елвир Мекиќ и пријателите на 6 јуни во Арената „Борис Трајковски“.

Во неодамнешно интервју за „Слободен печат“, Јованов отворено зборуваше за музиката и за разводот со поранешната сопруга Николина и нивниот денешен однос како и животот во Канада.

„Животот во Канада е доста поорганизиран и мирен. Кога не сум во студио, најмногу време поминувам со ќерка ми. Искрено таму сум многу со смирен, а во Македонија 300 на саат. Ќерка ми расте многу брзо и наскоро ќе наврши 14 години. Има чувство за ритам и музика, но не верувам дека музиката би ѝ била професија, а јас никогаш не би сакал да ѝ го наметнувам тоа. Сепак е нејзин избор. Најважно ми е да биде среќна и исполнета“, рече Јованов за ќерката.

„Со Николина имаме коректен и зрел однос. Кога има дете, мора да постои почит и комуникација без разлика на сè. Заедничкото работење функционира затоа што и двајцата сме професионалци и знаеме да ги одделиме приватните работи од обврските. Мислам дека пријателство и бизнис можат да опстанат и по крај на бракот ако постои зрелост и заемна почит“, рече Јованов за поранешната сопруга.

Заеднички, тие се сопственици на студио за фотосесии и снимање видеоспотови.