Интер ќе остане без легендарниот спонзор после 27 години
Позната компанија се откажува од соработка со „неро-аѕурите“ од следна натпреварувачка сезона 2021/2022. Извршниот директор на „Пирели“, Марко Тронкети потврди дека Интер од следната сезона ќе има нов спонзор на своите гради и дека тоа нема да биде неговата компанија.
Познатата компанија за производство на автомобилски гуми е главен спонзор на миланскиот клуб веќе 27 години, така што славните „сино-црни“ дресови не можат да се замислат без таа издолжена буква П.
– Преговараме со Антонело, Марота и другите директори на Интер. Повеќе нема да бидеме спонзор на дресот на Интер, иако нашата соработка ќе продолжи – рече Тронкети.
Кинеската компанија „Сунинг“ минатата недела потврди дека финансиски ќе го поддржува Интер сè додека не најде „соодветен партнер“, а Тронкети вели дека не се грижи за иднината на великанот од Милано.
– Мораме да се држиме до фактите. Тие неодамна „испумпаа“ голема сума пари и компанијата вети посветеност на клубот. Мислам дека тоа е нормален начин – додаде Тронкети.