Инспекција влезе во битолската болница за царскиот рез направен од невработена жена
Инспектори на Државниот здравствен и санитарен инспекторат (ДСЗИ) денеска влегоа во битолската болница, откако во полиција беше пријавено дека невработена жена извршила операција со царски рез во оваа болница.
Министерот за здравство Венко Филипче на прес-конференција изјави дека откако ќе ги почека резултатите од оваа инспекција ќе одлучи какви мерки ќе преземе.
Докторка од Белград, Србија, без соодветна лиценца за работа од Лекарската комора во земјава, е осомничена за надрилекарство, соопшти вчера Министерството за внатрешни работи (МВР). Таа е сопруга на М.В., 33-годишен гинеколог во битолската болница, кој заедно со неговиот колега гинеколог, 60-годишниот битолчанец Г.Ч., ги пречекориле своите овластувања. Оперативниот зафат на Одделението за гинекологија и акушерство во битолската болница се случил на 1 јануари годинава.
Директорката на битолската болница, доктор Билјана Гагачовска, за „Слободен печат“ рече дека цел медицински персонал што бил присутен дента се соочува со покрената дисциплинска постапка.
Скандал во битолската гинекологија: Невработено лице изведувало операција врз пациент