Игор Ангеловски поднесе оставка на местото тренер на Етникос Ахна
Поранешниот македонски селектор Игор Ангеловски поднесе оставка на местото тренер на кипарскиот фудбалски прволигашки клуб, Етникос Ахна.
Препорачано
Ако се исклучи победата во националниот Куп на почетокот на декември, Етникос Ахна влезе во серија порази во тамошниот шампионат.
Во саботата играчите на Ангеловски загубија на гости кај Хлорака со 3:1, што беше шести пораз во низа за моментно 10 место на табелата со 14 бодови.
– Денес остварив состанок на мое барање со претседателот на Етникос Ахна, Кикис Филипу и ја поднесов мојата оставка на позиција главен тренер, а заедно со мене заминува и мојот асистент Милан Илиевски. Победите и поразите се составен дел од фудбалската игра но оставката е чин на морална одговорност. Му благодарам на претседателот за укажаната доверба, на сите вработени, навивачи и фудбалери за соработката. Им посакувам понатамошни успеси во иднина на личен и професионален план – стои во објавата на Ангеловски на Фејсбук.
Во својата тренерска кариера Ангеловски претходно ги водеше и Работнички, ХНК Горица од Хрватска и Каспиј од Казахстан.
