Откако земјата ја стресе земјотрес со интензитет од 4,6 степени со епицентар на косовската страна на Шар Планина, а потоа серија послаби потреси беа регистрирани и во поширокиот регион, Институтот за демократија „Социетас цивилис“ Скопје (ИДСЦС) објави основни инструкции за заштита од земјотрес, правени во соработка со експерти.

„Не користете лифт за време и по земјотрес. Застанете под носечки ѕид додека тресењето не престане“, посочуваат оттаму.

Во инструкциите, визуелно прикажани, стои дека треба да се идентификуваат носечките внатрешни ѕидови и греди, а притоа да се обезбеди и мебелот во случај на земјотрес.

„За време на земјотрес, останете подалеку од надворешните ѕидови, прозорците, вратите и плакарите, изворите на толина. Спуштете се на подот да одржите стабилност на телото. Отползете до најблиската цврта маса и сокријте се под неа. Не паничете доколку прекине доводот на струја, вода и телекомуникации. Не користете лифт за време на ударот, ниту по завршување на земјотресот“, стои меѓу инструкциите.

Воедно, нагласено е дека по земјотресот, вообичаено е да следат помали потреси. Доколку има оштетувања во објектот, искуствата велат дека не е паметно да се вратите во домот, без да ви биде дозволено.