Израелската војска соопшти дека на жителите од северниот дел на Појасот Газа ќе им биде дозволено да се евакуираат на југ преку улицата Салах ал-Дин, додавајќи дека безбеден премин ќе биде овозможен четири часа, почнувајќи од денеска во 10 часот по локално време.

– За ваша безбедност, искористете ја оваа следна можност и движете се кон југ од Појасот Газа, соопшти армијата на својот арапски канал на X.

Израел и претходно издаваше слични предупредувања за евакуација и временски рокови за речиси 300.000 цивили кои сè уште се наоѓаат на северот на Појасот да се преселат на југ.

Сепак, освен логистичките предизвици, вклучително и недостапноста на транспорт и гориво, како и остатоците од урнатите згради и уништените патишта, голема е и загриженоста за безбедноста.

Неколку извештаи покажаа дека смртоносни воздушни напади и артилериски оган биле насочени кон конвои кои го послушале предупредувањето на Израел и се евакуирале од северниот дел на Појасот.

ОН соопштија дека речиси 30.000 луѓе решиле да се вратат на север откако заклучиле дека ризиците се исти и на југот.